Tenisti spanjoll Rafael Nadal, që ka fituar 22 tituj Grand Slami, tha të enjten se ai po i jepte fund karrierës së tij, një vendim që ai tha se do të jetësohet pas finales së Davis Cup, pas një rrugëtimi profesional që e bëri atë një nga tenistët më të mëdhenj të kohërave. “Kanë qenë disa vite të vështira, veçanërisht këto dy të fundit”, tha në një video 38-vjeçari, i cili fitoi 14 tituj kampion në French Open. "Jam shumë i emocionuar që turneu im i fundit do të jetë Kupa Davis që përfaqëson vendin tim. Po mbyll kështu rrethin sepse një nga gëzimet e mia të para ishte finalja në Sevilla në 2004." Faza eliminatore e Kupës Davis do të luhet nga data 19 deri më 24 nëntor. Karriera e Nadalit është shënjuar nga lëndimet ndërkohë që ai humbi French Open 2023 dhe u mund në raundin e parë nga gjermani Alexander Zverev këtë vit. Ai e fitoi titullin e tij të fundit në Roland Garros në 2022 dhe u largua nga Parisi me një rekord prej 112 fitoresh dhe katër humbjesh. Nadal ka luajtur ndërkohë vetëm 23 ndeshje në dy sezonet e fundit.