Ministri i Jashtëm rus, Sergei Lavrov, ka hedhur poshtë akuzat gjermane për përfshirjen e Moskës në incidentin me një dron të pajisur me eksplozivë pranë aeroportit të Leipzigut, duke paralajmëruar se pretendimet ndaj Rusisë mund të çojnë në një përshkallëzim serioz të situatës. “Akuzat kundër Rusisë janë fillimi i një lufte të vërtetë”, deklaroi Lavrov, duke i cilësuar pretendimet e Berlinit si një provokim të nxituar. Incidenti në aeroport është kthyer në një çështje të ndjeshme në marrëdhëniet mes Gjermanisë dhe Rusisë. Autoritetet gjermane dyshojnë se droni i zbuluar pranë një avioni transporti ukrainas kishte karakteristika të teknologjisë ruse dhe ishte i pajisur me eksplozivë. Hetimet kanë çuar deri tani te dy persona të dyshuar për përfshirje në operacion. Njëri prej tyre është një burrë me origjinë ruse dhe pasaportë letoneze, i cili dyshohet se ka koordinuar veprimtarinë dhe ka pasur kontakte me shërbimet sekrete ruse. Sipas mediave gjermane, ai kishte hyrë në Gjermani përmes aeroportit të Berlinit dhe më pas kishte udhëtuar drejt Leipzigut me një automjet me qira. Pas incidentit, dyshohet se ai është larguar sërish nga vendi.