Monika Kryemadhi kërkon nga Gjykata e Lartë që të shfuqizojë masën e sekuestros ndaj një vile të ndodhur në zonën e Kodrës së Diellit në Tiranë, që është bllokuar me kërkesë të SPAK dhe me vendim të të dy shkallëve të gjykatës së posaçme. Rekursi në Gjykatën e lartë është regjistruar më 26 shkurt dhe relator në këtë çështje është caktuar gjyqtari Ilir Panda. Pas shortit për relatorin, pritet që gjyqtari Panda të caktojë datën e mbajtje së seancës në lidhje me këtë çështje. Në muajin nëntor të vitit 2024, GJKKO sekuestroi dy vila në zonën e Kodrës së Diellit njëra në emër të Monika Kryemadhit dhe tjetra në emër të nënës së saj, Fatime Kryemadhi. Apeli i Posaçëm liroi nga sekuestro vilën e Fatime Kryemadhit, që po hetohet në gjendje të lirë në kuadër të dosjes ku në arrest me burg është Ilir Meta dhe me masën detyrim paraqitje është Monika Kryemadhi. Këta dy të fundit bëhen bashkë në dosjen e SPAK, por ndahen në procesin gjyqësor për divorcin në Gjykatën e Tiranës, ku seanca e pajtimit dështoi.