Top News-Ministri Çuçi-do godasim çdo kënd/SPAK lëshoi 23 urdhër arreste, për droge mes tyre zyrtarë

Ministri i Brendshëm, Bledi Çuçi, ka reaguar pas operacionit për kultivim droge në Skrapar, ku Prokuroria e Posaçme Kundër Korrupsionit dhe Krimit të Organizuar Tiranë, lëshoi 23 urdhër arreste, e mes tyre janë të përfshirë edhe zyrtarë të lartë të policisë së Shtetit. Në një postim në rrjetet sociale, ministri Çuçi e quaj këtë një operacion të rëndësishëm i cili zbuloi edhe zyrtarët e Policisë së Shtetit, “që duke shpërdoruar detyrën u bënë palë në këtë aktivitet kriminal”. “Shpreh bindjen dhe angazhimin e Ministrisë së Brendshme, për thellimin dhe shtrirjen e hetimeve gjithëpërfshirëse, për të goditur çdokënd që do të tentojë të përfshihet në paligjshmëri, duke i përballur ata me drejtësinë. Vetëm kështu do të ndërtojmë një Shqipëri më të sigurt e më të mirë për të gjithë”, shkruan ministri i Brendshëm. “Nga hetimet e kryera, si përgjimet telefonike, vëzhgimet e kryera nga policia gjyqësore, rezulton se në territorin e rrethit te Skraparit ishin kultivuar bimë narkotike cannabis sativa në parcela dhe vende të ndryshme, pothuajse në gjithë këtë territor. Janë dokumentuar disa episode të sekuestrimeve të lëndëve narkotike dhe personat e dyshuar të përfshirë në këtë aktivitet kriminal. Janë dokumentuar dhe sekuestruar lëndë narkotike e llojit cannabis sativa në 28 episode, në të cilat ishin ngritur impjante vaditje, vendqëndrimi dhe vendstrehime për punonjësit që punonin në këto parcela dhe gjithë infrastruktura e nevojshme për këtë aktivitet kriminal”, thuhet në njoftimin e SPAK.