Shtimi i infektimeve me covid 19 në shifra alarmante që për tre ditë me radhë kanë kaluar mbi 1000 raste në ditë, ka sjellë reagimin e kreut të shtetit. Përmes një postimi në rrjetet sociale presidenti i vendit Ilir Meta ka deklaruar se pandemia e covid 19 në vendin tonë po del jashtë kontrollit dhe i ka konsideruar tronditëse të dhënat për humbjet e jetëve nga ky virus. “Kapacitetet spitalore për të pritur shtrimet e reja ditore, rezultojnë të tejmbushura. Ndërkohë veç propagandës, asnjë plan nuk ka për nisjen e vaksinimit masiv të popullsisë. Duke shprehur shqetësimin më madh për këta tregues të dhembshëm, i bëj thirrje Qeverisë të mos bëjë sehir dhe as mos t’i trajtojë qytetarët, si numra për statistika ditore, duke i lënë në mëshirë të fatit”, thuhet në postimin e presidentit Meta. ai ka pohuar se të gjithë qytetarët shqiptarë meritojnë të trajtohen me dinjitet dhe të kenë askitencën e domosdoshme këshillimore dhe shëndetësore nga ana e shtetit, për të përballuar pasojat e rrezikshme të pandemisë. “Është e patolerueshme të numërohen çdo ditë të infektuarit dhe jetët e humbura dhe të mos merret asnjë masë për të frenuar COVID-19. Nevojitet urgjentisht, një strategji e re dhe efikase, për të frenuar pandeminë, përmirësuar kushtet në spitale, mbështetur financiarisht të prekurit dhe familjet e tyre dhe rritur nivelin ndërgjegjësues të popullatës. Çdo vonesë është kosto e madhe për qytetarët, shëndetin dhe jetën e tyre dhe kjo është jo vetëm e pafalshme, por edhe e dënueshme”, thuhet në reagimin e Metës. Ai u ka bërë thirrje qytetarëve që të mos ulin vigjilencën, por të vazhdojnë të zbatojnë rregullat anticovid.