Ministria e Arsimit ka informuar lidhur me situatën tek shkolla 9-vjeçare ‘’Emin Duraku’’ në Tiranë, ku 8 mësues kanë rezultuar me COVID-19 dhe 20 të tjerë janë karantinuar. Pavarësisht situatës së krijuar me Covid-19, Ministria e Arsimit thotë se në shkollën 9-vjeçare “Emin Duraku” në kryeqytet, mësimi po vijon normalisht. Në një deklaratë për mediat, MASR sqaron se për shkak se disa mësues kanë rezultuar me COVID-19 dhe disa të tjerë janë karantinuar, nga ana e DPAP dhe zyrës arsimore vendore Tiranë janë marrë masat e menjëhershme për zëvendësimin e tyre në mënyrë që mësimi të vijojë pa ndërprerje. Njëkohësisht, vijon MASR, është shtuar edhe numri i psikologëve për të qenë sa më pranë nxënësve e mësuesve me shërbimin psiko-social. Ministria e Arsimit siguron prindërit e të gjithë opinionin publik se ne po punojnë intensivisht që jo vetëm në këtë shkollë por në të gjithë vendin, ambientet e shkollave tona të jenë të sigurta, me higjienizim të vazhdueshëm, me masa që respektohen e me nivel të lartë ndërgjegjësimi nga ana e nxënësve, mësuesve dhe gjithë stafit të shkollave. Reagimi i Ministrisë së Arsimit erdhi pas denoncimit të ish-deputetes së PD-së, Albana Vokshi, e cila duke folur nga shkolla “Emin Duraku” tha se Drejtoria nuk u jep prindërve asnjë informacion për mësuesit e infektuar, teksa theksoi se zëvendësimi i tyre nuk është zgjidhje.