Paneli i Gjykatës së Apelit në Dhomat e Specializuara të Kosovës në Hagë ka vendosur ta ulë në 13 vjet burg Pjetër Shalës, pasi është shpallur më herët fajtor për krime lufte, të kryera në vitin 1999. Paneli rrëzoi shumicën e pikave të ankesës së Shalës - përfshirë shkeljet e të drejtave të tij gjatë procedimit të materialeve të dëshmitarëve dhe pretendimet se gjykimi filloi para se mbrojtja të ishte gati për këtë. Por megjithatë, sic thekson REL, ai ka gjetur parregullsi edhe në aktgjykimin e Themelores. Në fund, paneli caktoi "dënimin unik me 13 vjet burgim që hyn në fuqi menjëherë”. Shala, ish-pjesëtar i Ushtrisë Çlirimtare të Kosovës, u dënua me 18 vjet burg në korrik të vitit 2024, pasi u gjet fajtor për ndalim arbitrar, torturë dhe vrasje në Fabrikën e Metalit në Kukës - pjesa veriore e Shqipërisë. Sipas aktakuzës, ai dhe pjesëtarë të tjerë të UÇK-së morën pjesë në ndalimin dhe keqtrajtimin e të dyshuarve për bashkëpunim me Serbinë dhe të atyre që nuk merrnin pjesë aktive në luftime. Viktimat, sipas aktakuzës, ishin subjekt i dhunës fizike dhe psikologjike, përfshirë kërcënimet me vdekje, poshtërimet dhe ngacmimet. Gjykata e urdhëroi Shalën të paguante edhe 208 mijë euro si kompensim për tetë viktima, ndërsa e shpalli të pafajshëm për veprën penale të trajtimit çnjerëzor. Dhomat e Specializuara të Kosovës, të njohura ndryshe si Gjykata Speciale, punojnë me ligjet e Kosovës, por prokurorët dhe gjyqtarët e tyre janë ndërkombëtarë.