Presidenti i SHBA-së, Donald Trump përcolli të dielën shpresën e tij se bisedimet për një armëpushim mes Izraelit dhe Hamasit mund të arrijnë rezultat brenda kësaj jave. The Times of Israel shkruan se ndërsa zyrtarët amerikanë dhe izraelitë shprehën optimizëm javën e kaluar në lidhje me shanset për një marrëveshje të afërt, negociatat ngecën në katër ditët e fundit, e kjo sipas medias së njohur vjen edhe si pasojë e faktit që kryeministri izraelit Benjamin Netanyahu po i zvarrit bisedimet qëllimisht. Për këtë pohim, gazeta citon njëburim të përfshirënë përpjekjet e ndërmjetësimit. Shtetet e Bashkuara mbështesin një armëpushim 60-ditor me një lirim gradual të pengjeve, tërheqje të trupave izraelite nga pjesë të Gazës dhe bisedime për t’i dhënë fund konfliktit. I dërguari i Trumpit për Lindjen e Mesme, Steve Witkoff, tha më herët se ka shumë shpresa për negociatat e armëpushimit në Gaza.Netanyahu, i cili u takua dy herë javën e kaluar në Shtëpinë e Bardhë me Trumpin dhe zyrtarët e tij, ka vazhduar të këmbëngulë se lufta nuk mund të përfundojë derisa Hamasi të mos ketë më aftësi qeverisjeje ushtarake ose civile dhe Gaza të mos mund të përbëjë më kërcënim për Izraelin. Ai është zotuar t`i përmbushë me cdo kusht këto qëllime dhe kthimin e të 50 pengjeve, 20 prej të cilëve besohet të jenë ende gjallë.