Tensionet në veri të Kosovës, për presidenten Vjosa Osmani, janë rezultat i përpjekjeve të Serbisë, e ndihmuar dhe nxitur nga Moska. Në një intervistë për BBC Neësnight, Osmani thotë se ka patur prej një kohe të gjatë përgatitje nga Serbia, me ndihmën dhe nxitjen e Rusisë, për të destabilizuar Ballkanin perëndimor, vecanërisht Kosovën. “Vuçiç muajt e fundit i ka dhënë mbështetje strukturave ilegale në veri të Kosovës, të cilat përbëhen nga banda kriminale. Përmes tyre dhe duke i manipuluar ato, po mbajnë peng pakicën serbe që jeton në Kosovë”, thotë Osmani. Ajo nënvizoi se Kosova nuk ka kontribuar dhe nuk do të kontribuojë asnjëherë në përshkallëzim apo dhunë. “Por – thekson ajo - ne duhet të kuptojmë se jetojmë afër një fqinji që kontrollohet plotësisht nga Rusia. Nuk janë akuzat tona ato që përshkallëzojnë situatën, janë veprimet e tyre që përshkallëzojnë situatën dhe krijojnë tensione”, tha presidentja.