Koronavirusi ka vrarë më shumë se dyfishin e numrit të raportuar zyrtarisht. Analistët në SHBA vlerësojnë se sëmundja ka shkaktuar rreth 6.9 milionë viktima në shkallë globale. Ata paralajmëruan se shifrat e ulëta të testimit dhe sistemet e dobëta të kujdesit shëndetësor në vendet në zhvillim, janë faktorë kryesorë në këto statistika të mangëta. Por një numër i madh viktimash nuk janë raportuar as në vendet perëndimore që janë përballur me më të keqen e pandemisë, përfshitrë Britaninë e Madhe, SHBA-në dhe italinë, sipas studimit. Në studim theksohet se kjo ka ardhur kryesisht për shkak të mungesës së testimeve në fillimin e pandemisë, kur shumë pacientë me covid kanë humbur jetën pa e konfirmuar sëmundjen. Instituti i Universitetit të Uashingtonit për matjet dhe vlerësimin, paralajmëroi se të dhënat tregojnë se bilanci i vërtetë i pandemisë është shumë më i rëndë se ai që është thënë. Sipas analizës, SHBA ka numrin më të madh të viktimave në shkallë globale, me mbi 900 mijë. Një shifër kjo dukshëm më e lartë se 574 mijë të regjistruarit zyrtarisht. Ajo ndiqet nga India dhe Meksika, që vlerësohet se kanë regjistruar më shumë se 600 mijë viktima të virusit, tre herë më shumë nga shifrat që disponon OBSH.