Një inxhiniere gjermane u bë të shtunën përdoruesja e parë e karrocës me rrota që fluturoi në hapësirë, duke bërë një udhëtim të shkurtër me një fluturim të Blue Origin. Kompania hapësinore në pronësi të multimiliarderit amerikan Jeff Bezos nisi misionin e saj suborbital Neë Shepard në orën 8:15 të mëngjesit, nga vendi i saj i ngritjeve në Teksas. Michaela Benthaus, një inxhiniere hapësinore dhe mekatronike në Agjencinë Evropiane të Hapësirës, ishte midis pasagjerëve që kaluan vijën Karman, kufirin e njohur ndërkombëtarisht të hapësirës, gjatë fluturimit që zgjati afërsisht 10-minuta. Benthaus pësoi një dëmtim të palcës kurrizore pas një aksidenti dhe tani përdor një karrocë me rrota. "Pas aksidentit tim, me të vërtetë, e kuptova se sa e paarritshme është ende bota jonë" për njerëzit me aftësi të kufizuara, tha ajo në një video të publikuar nga kompania. "Nëse duam të jemi një shoqëri gjithëpërfshirëse, duhet të jemi gjithëpërfshirës në çdo pjesë, dhe jo vetëm në pjesët që na pëlqen të jemi", shtoi Benthaus. Raketa e vogël, plotësisht e automatizuar, u ngrit vertikalisht dhe kapsula që mbante turistët u shkëput në fluturim përpara se të zbriste butësisht përsëri në shkretëtirën e Teksasit, e ngadalësuar nga parashutat. Ishte fluturimi i 16-të me ekuipazh për Blue Origin, që për vite me radhë ka ofruar fluturime turistike hapësinore, me një cmim që nuk është publik, duke përdorur raketën e saj Neë Shepard. "Urime, Michi! Sapo frymëzove miliona njerëz të shikojnë lart dhe të imagjinojnë se çfarë është e mundur," tha shefi i ri i NASA-s, Jared Isaacman, në X.