Numri I aksidenteve rrugore cdo muaj vijon të jetë I lartë. Kjo si pasojë e pakujdesisë së drejtuesve të mjeteve, të cilët shpesh herë tejkalojnë shpejtësinë e lejuar dhe në raste të tjera drejtojnë mjetin në gjendje të dehur apo nën efektin e alkolit. Policia rrugore, bëri me dije se vetëm këtë fundjave janë vënë në pranga 33 drejtues mjetesh, 18 prej tyre për drejtim mjeti në gjendje të dehur dhe 15 të tjerë për drejtim mjeti pa leje drejtimi. Po përgjatë këtyre 48 orëve janë pezulluar 176 leje drejtimi, nga këto 111 për shpejtësi tej normave të lejuara, deri në 214 km/h në Bypass-in e Fierit, 60 për drejtim mjeti në efektin e alkoolit dhe 5 të tjerë për qarkullim në sens të kundërt. Gjithashtu janë ndëshkuar me masë administrative 4 mijë e 123 drejtues mjetesh, për shkelje që perbejne rrezik potencial për përfshirje në aksidente rrugore. Shërbimet policore të Tiranës kanë vënë në pranga një shtetas, i cili pasi është konstatuar duke drejtuar automjetin pa rrip sigurimi, i ka ofruar një shumë parash shërbimeve policore, me qëllim shmangien e ndëshkimit për shkeljen e kryer. Ndër të tjera, është kapur në flagrancë një drejtues mjeti që transportonte disa shtetas të huaj, me destinacion final një nga vendet e BE-së.