Figura kontroverse me shumë ndikim në internet, Andreë Tate, dhe vëllai i tij janë nisur me avion drejt Shteteve të Bashkuara, duke u larguar nga Rumania ku kanë qenë të përfshirë në një çështje ligjore nën dyshime për trafikim të qenieve njerëzore dhe shfrytëzim seksual. Njësia e prokurorisë kundër krimit të organizuar në Rumani, tha të enjten se gjykatësit kanë hequr masën e ndalimit për vëllezërit, me shtetësi britanike dhe amerikane, të cilët ishin nën masën e arrestit shtëpiak për shkak se dyshohen për një rast penal. Kjo njësi nuk dha detaje se pse u është hequr masa e ndalimit të udhëtimit, por njoftimi vjen pasi ministri i Jashtëm i Rumanisë, Emil Hurezeanu, tha se rasti i vëllezërve është ngritur më herët gjatë këtij muaji nga Richard Grenell, i dërguari i presidentit amerikan, Donald Trump, për misione të posaçme. Si ministri i jashtëm, ashtu edhe kryeministri Marcel Ciolacu kanë thënë se nuk kanë pasur presion nga zyrtarët amerikanë për të liruar vëllezërit. Mediat rumune thanë se një avion privat u nis nga Bukureshti më herët, të enjten, drejt Shteteve të Bashkuara dhe në bordin e tij ishin vëllezërit Tate.