Nga kjo e hënë ka filluar shpërndarja e bonusit të pranverës për pensionistët. Deri më tani 22 mijë e 718 të moshuar kanë tërhequr bonusim, teksa të tjerët kanë afat deri në 30 shtator për t’u paraqitur në pikat e postës shqiptare apo bankat e nivelit të dytë për të tërhequr bonusin e pranverës. Sipas të dhënave zyrtare në total janë 730 mijë e 430 pensionistë që përfitojnë nga vendimi i këshillit të ministrave për të shpërndarë bonus dy herë në vit në pranverë dhe në fundvit. Përfitojnë bonus 10 mijë lekë ose 100 Euro të gjithë ata pensionistë, pensioni mujor i të cilëve është më i ulët se 20 mijë lekë dhe 5 mijë lekë ose 50 Euro të gjithë ata pensionistë, vlera e pensionit mujor të të cilëve është mbi 20 mijë lekë . Për garantimin e bonusit të Pranverës, u krijua një llogari speciale në Bankën e Shqipërisë, në mbështetje të pensionistëve në të cilën u transferua një fond prej 6.3 miliardë lekësh.