Shfaqja e variatit Omicron në vendin tonë dhe shtimi i rasteve të reja të infektimit, ka bërë që ministria e shëndetësië të marrë disa masa shtrënguese për frenimin e përhapjes së virusit. Komiteti teknik i ekspertëve në ditët e fundit të vitit që lamë pas, njoftoi se duke filluar nga data 4 janar, disa kategori të cilët janë të punësuar në administrate publike do të duhet të paraqesin certifikatën e vaksinimit, Test PCR, të kryer brenda 72 orëve si dhe provë të kalimit të infeksionit Sars-Cov-2 të vlefshme deri në 6 muaj pas shërimit. Duke filluar nga kjo e martë, të gjithë punonjësit e administratës publike, të supermarketeve dhe qendrave tregtare si kategori që përbëjnë rrezik për të tjerët, duhet të zbatojnë këto masa për tu paraqitur në punë. Nga ana tjetër, për personat që futen në kufi, pra që vijnë nga vendet e tjera drejt Shqipërisë, vlejnë po të njëjta rregulla pra u kërkohet pasaporta e vaksnimit, testi PCR ose një dokument ku dëshmojnë se e kanë kaluar koronavirusin 6 muaj më parë. Ndërsa, qytetarët rezidentë të Shqipërisë që nuk kanë asnjë nga dokumentet e përmendura më lart, duhet të vetë izolohen për një periudhë 10 ditore dhe të informojnë autoritetet shëndetësore për të kryer një test në fund të periudhës së izolimit. Sa I përket masave të tjera, vijon të mbetet ne fuqi urdhri për përdorimin e maskave në ambiente të mbyllura në të gjithë ato vende ku nuk sigurohet distancimi fizik. Si dhe vijon të mos lejohet grumbullimi deri në 50 persona.