Qeveria e kryeministrit Zoran Zaev ka marrë votëbesimin në kuvend, me 62 vota pro dhe asnjë kundër pasi opozita braktisi sallën duke mos marrë pjesë në votim. Po ahstu në sallë nuk pati asnjë abstenim. Zaev, më herët kërkoi në kuvend votëbesimin për shkak të pretendimeve të VMRO-DPMNE-së se posedon një shumicë të re në kuvend. Kryetari i VMRO DPMNE-së, Hristijan Mickoski, në mënyrë të përsëritur ka deklaruar se shumica parlamentare e ka humbur mbështetjen dhe se vendi duhet të shkojë në zgjedhje të parakohshme parlamentare. “Ky është momenti kur duhet të shohim se kush sa numra ka në Kuvend, ne apo opozita, e cila vazhdimisht pretendon se do ta rrëzojë Qeverinë dhe do të formojë një shumicë të re. Lajmet e rreme dhe bllokadat krijojnë pasiguri politike. Unë nuk do ta lejoj këtë, andaj edhe kërkoj votëbesim për Qeverinë”, tha të më herët para deputetëve kryeministri Zoran Zaev. Votëbesimi u bë pa debat, pasi Zaev e paraqiti kërkesën në bazë të nenit të rregullores mbi punën e Kuvendit, që nuk parashikon debat, por vetëm votim për punën e Qeverisë. Opozita e kritikoi këtë propozim dhe tha se Zaev ka frikë të përballet me fjalimet e opozitës për dështimin e punës së Qeverisë.