Inspektorati i Lartë i Drejtësisë ka nisur verifikimet në lidhje me procedurën e ndjekur në rastin e lirimit nga burgu të vrasësit të 23-vjeçares, Sabrina Bendaj. “Prej momentit të parë, jam duke ndjekur me vëmendje raportimet mbi ngjarjen e rëndë të vrasjes së një 23 vjecareje nga ish bashkëshorti në Zhupan të Fierit. Ka nisur menjëherë vlerësimi i rastit dhe i të dhënave që dalin në media mbi veprimet e magjistratëve”, thuhet në deklaratën e shkurtër të ILD-së. 23-vjeçarja Sabrina Bendaj u vra nga ish-bashkëshorti Elton Meta, 31 vjeç në ngjarjen e rëndë të ndodhur në fshatin Zhupan të Fierit. Elton Meta kishte pak kohë që kishte dalë nga burgu, ndërkohë që vijonte të shqetësonte ish-bashkëshorten e tij, pavarësisht se kundrejt saj ezkustonte urdhri i mbrojtjes I caktuar nga gjykata. Mësohet se vendimi për lirimin e Metës është dhënë nga gjyqtari Piro Sota. Ky i fundit është dorëhequr dhe KPA ka vendosur ndërprerjen e hetimeve të mëtejshme për të, duke e përjashtuar automatikisht me 15 vite nga drejtësia. Në dokumentet e siguruar nga Top Channel mësohet se Elton Bengaj Metaj dhe Sabrina Bengaj ishin ndarë prej gati një viti. Në janar, prokurori i çështjes, Çlirim Sina pa pasur pretendim nga familjarët apo i pandehuri dhe ka kërkuar në gjykatë që Elton Meta të mos qëndrojë në qelinë e paraburgimit të Fierit, por të shkojë në spitalin e burgut të Zaharisë, për ata që janë me probleme të shëndetit mendor, bazuar mbi një ekspertizë nga mjekë të Institutit Ligjor. Gjykata me një vendim të gjyqtarit Piro Sota, kishte vendosur më 1 mars 2021 caktimin si masë mjekësore ndaj Elton Metaj Bengaj, atë të ‘mjekimit të detyruar në një institucion mjekësor’. Po kështu, kishte vendosur dhe pushimin e çështjes penale të ndërmarrë një vite më parë për ‘Dhunë në familje’, ‘Kundërshtim i punonjësit të policisë së rendit publik’, ‘Mbajtja pa leje dhe prodhimi i armëve, armëve shpërthyese dhe i municionit’. Ndërsa më 26 korrik 2021, po Gjykatësi Piro Sota ka vendosur zëvendësimin e masës mjekësore ndaj Metaj, nga ‘mjekim i detyruar në një institucion mjekësor’ në masën mjekësore ‘mjekim i detyruar ambulator’ nën kujdesin e babait të tij Bashkim Meta. Këto masa dhe vendime gjykatash nuk mundën të parandalonin krimin e rëndë në Fier që i mori jetën një nëne të re, të një vajze 3-vjeçare.