Aksioni për lirimin e hapësirave publike në qytetin e Vlorës vijon me intensitet, duke u përqendruar aktualisht në bulevardin kryesor “Ismail Qemali”. Bashkia e Vlorës në bashkëpunim me Policinë Bashkiake, po ndërmerr masa konkrete për të hequr zaptimet e paligjshme që pengojnë lëvizjen e lirë të këmbësorëve dhe dëmtojnë pamjen urbane të qytetit. Strukturat përgjegjëse po ndërhyjnë ndaj elementëve të vendosur pa leje, si tavolina, kioska, apo struktura të përkohshme nga subjektet private, të cilat kanë zënë trotuaret dhe hapësirat publike. Ky operacion ka për qëllim të rikthejë bulevardin “Ismail Qemali” në një zonë funksionale dhe estetike, në shërbim të qytetarëve dhe vizitorëve. Aksioni nisi fillimisht në zonën e Lungomares dhe tashmë po shtrihet në të gjithë territorin e qytetit. Autoritetet lokale kanë theksuar se operacioni do të vijojë deri në lirimin e plotë të hapësirave publike të zëna në mënyrë të paligjshme.