Nga Suhodolli, ku mori pjesë në nisjen e fushatës së korrje-shirjes së grurit në një fermë, kryeministri i Kosovës, Albin Kurti komentoi edhe protestën e Veteranëve të luftës Çlirimtare të Kosovës. Këta të fundit kërkuan që të përfshihen në ligjin e ri për rritjen e pagave minimale, i cili është gati dhe pritet të miratohet të enjten në Kuvend, megjithatë kryeministri Kurti ishte i qartë në ëndrimin e tij. “Ne jemi për benefite sa më të larta për veteranët e luftës çlirimtare, por këto benenifte nuk janë page, sepse paga është për punë, ndërkaq benefitet janë mirënjohje e shoqërisë e cila i jepet veteranit të luftës për luftën çlirimtare e cila është në burim të shtetësisë, pavarësisë e të lirisë sonë”, tha kryeministri Kurti. Duke nënvizuar se project-ligji që do të kalojë të enjten në Kuvend është hartuar për pagat, Albin Kurti pranoi se ka ardhur momenti për të hartuar nëj ligj të ri për veteranët e luftës çlirimtare të Kosovës. “Ne jemi gati për të hartuar nëj ligj të ri, por për këtë duhet të kemi evidence të sakta. Unë mendoj se në luftën çlirimtare kanë marrë pjesë më shumë se 60 mijë njerëz, mirëpo numri i veteranëve është trefishuar”, deklaroi Albin Kurti.