Top News/ Kurti, optimist për anëtarësimin në KiE: Hapi i parë drejt bashkimit me familjen evropiane

Kryeministri Albin Kurti ka folur rreth anëtarësimit në Këshillin e Evropës dhe kërcënimeve të Serbisë për braktisjen e organizatës evropiane në rast të anëtarësimit të Kosovës në takimin e ministrave të Jashtëm që do të mbahet më 16 maj. Asambleja Parlamentare e Këshillit të Evropës ka mbështetur anëtarësimin e vendit tonë në këtë organizatë, dhe në votimin e 16 prillit në Strasburg votuan pro 131 deputetë, kundër 29 dhe 11 abstenuan, ndërsa asnjë nga amendamentet e propozuara nga Serbia nuk u miratuan dhe u hodhën poshtë. Kurti tha se Këshilli i Evropës në 75-vjetorin e themelimit duhet të zgjerohet me Kosovën si anëtare e 47-të, pavarësisht kërcënimeve të Serbisë. “Ne duam të kontribuojmë dhe pasurojmë vlerat e parimet demokratike të kësaj organizate. Anëtarësimi ynë përbën dhe hapin e parë drejt bashkimit tonë me familjen evropiane. Regjimet autoritare e jo-demokratike janë përjashtuar ose kërcënojnë me largim nga Këshilli i Evropës, ndërsa Republika e Kosovës po kërkon me meritë anëtarësimin në këtë organizatë që mbron e promovon pikërisht të drejtat e njeriut, sundimin e ligjit dhe demokracinë”, ka shkruar ai në Facebook. Kryeministri Kurti sapo ka përfunduar një vizitë në Gjermani, ku ka zhvilluar takime me zyrtarë dhe deputetë të Bundestagut, dhe ka kërkuar mbështetje për anëtarësim në KiE.