Menjëherë pas zgjedhjes së Bajram Begajt në postin e presidentit të ri të republikës me votat e 78 deputetëve të Kuvendit, erdhën dhe reagimet e para nga faktorë vendas dhe ndërkombëtarë. Përshëndetjet nga radhët e kabinetit qeveritar për presidentin e sapozgjedhur nuk mund të mungonin, por një mesazh urimi erdhi dhe nga një prej kundërshtarëve kryesorë të kësaj mazhorance, ai nga presidenti aktual Ilir Meta. Përmes një postimi të shkurtër në rrjetet sociale Meta zgjodhi të urojë pasardhësin e tij me një fjali. Ilir Meta e tregoi edhe më herët se nuk do ta pengonte procesin e zgjedhjes së Begajt duke e dekretuar shkarkimin e tij online, pasi ndodhej për një vizitë në Turqi. Enkelejd Alibej nuk ndryshoi nga qëndrimi i mëhershëm i bojkotit të zgjedhjes së presidentit. Reagimi i tij që i ngjashëm me të mëhershmit se opozita nuk mund të bëhej e një farse të Edi Ramës. Një urim për presidentin e ri erdhi dhe nga trojet e Kosovës. Vetë presidentja Vjosa Osmani dha vlerësimet për kreun e ri të shtetit shqiptar duke shtuar se mezi pret që të punojë me të për të forcuar marrëdhëniet vëllazërore. Mesazhe erdhën dhe nga përfaqësitë diplomatike në vendin tonë, por edhe nga krerët e institucioneve europiane. Ambasada amerikane përvec mesazhit të urimit vlerësoi dhe rolin e gjeneralit Begaj në detyrën e Shefit të Shtabit, duke shtuar se ai kontribuoi në forcimin e marrëdhënieve mes Shqipërisë dhe Shteteve të Bashkuara në fushën e mbrojtjes.