Kufizimet e Bankës së Shqipërisë për kredimarrjen për banesa nuk frenuan rritjen e huasë së individëve te bankat e nivelit të dytë. Të dhënat zyrtare tregojnë se në tremujorin e tretë të këtij viti, kredia për konsum udhëhoqi rritjen me mbi 20 për qind në krahasim me të njëjtën periudhë të një viti më parë, ndërsa kredia për strehim pasoi me pak më shumë se 18 për qind. Banka e Shqipërisë vlerëson se ecuria e këtyre kredive lidhet me rritjen e pagave dhe uljen e informalitetit, si dhe me normat favorizuese që ofron tregu bankar në vendin tonë. Banka e Shqipërisë miratoi në korrik të këtij viti një rregullore të re, ku kufizon kredinë për shtëpinë e parë jo më shumë se 80 për qind e pronës që blihet dhe 75 për qind në rastet kur është shtëpi e dytë. Ndërkohë, ndryshe nga kredia për individë, ajo për bizneset ka pësuar rënie me 5 për qind në krahasim me vitin e kaluar.