Top News – Kosova ‘kërkon tokat’ në Mal Të Zi/ Prona në vende si Budva, Ulqin, Tivar, Tivat, etj

Në bregdetin e Malit të Zi gjenden disa prona që i përkasin Kosovës që nga koha e ish-Jugosllavisë, por të cilat aktualisht janë uzurpuar, privatizuar apo janë tjetërsuar nga ndërmarrje të ndryshme në vend. Këto prona gjenden në qytetet më të njohura bregdetare, si në Budva, Ulqin, Tivar, Tivat etj., dhe paraqesin vendet më të bukura për zhvillimin e turizmit në Mal të Zi. Ministria e Drejtësisë e Kosovës, kohë më parë, ka ushtruar një padi për kthimin e së drejtës së pronësisë, të cilin veprim e mbështesin edhe disa përfaqësuesë politikë në Mal të Zi. Ish-nënkryetari i Parlamentit të Malit të Zi dhe deputeti aktual, Genci Nimanbegu ka kërkuar vazhdimisht që të respektohet e drejta e pronës. Ndërkaq, Zv/Kryeministri i Malit të Zi, Dritan Abazoviç fajësoi sistemin gjyqësor dhe prokurorinë e vendit për neglizhencë në zgjidhjen e problemeve pronësore. Agjencia Kosovare e Privatizimit ka evidentuar 35 prona që ndodhen në Mal të Zi. Përveç pronave në bregdetin malazez, pronat tjera janë objekte dhe zyra nëpër disa qytete të vendit.