144 pacientë të prekur nga koronavirusi janë shtruar në spital në kosovë ndërkohë që nga shpërthimi i epidemisë, në mes të marsit, janë konfirmuar gjithsej në vend 3508 raste të koronavirusit. Prej tyre 75 persona kanë humbur jetën ndërsa 1531 mbeten rastet aktive. Bordi drejtues i shërbimit spitalor dhe klinik universitar të kosovës, ka shkarkuar ndërkohë të hënën drejtorin e përgjithshëm, Basri Sejdiu. “Shkarkimi vjen si pasojë e performancës jo të kënaqshme dhe mospërmbushjes së detyrave. Në vend të dr Sejdiut, ushtrues detyre i drejtorit është caktuar dr Valbon Krasniqi, mjek specialist i infektologjisë”, thuhej në deklaratën e shërbimit. Kjo e fundit nuk jepte detaje se për cfarë performance bëhet fjalë dhe se cilat detyra nuk janë përmbushur. Por, shkarkimi i sejdiut vjen në kohën kur qendra klinike universitare e kosovës po përballet me numër të shtuar pacientësh të prekur me covid 19 dhe një ditë pasi policia rrethoi ambjentet e QKUK ku pesë pacientë raportohet se humbën jetën për shkak të mos funksionimit të respiratorëve. Prokuroria themelore në prishtinë ka nisur ndërkohë hetimin për të zbardhur ngjarjen. Edhe Policia e Kosovës njoftoi se po heton vdekjen e gjashtë personave në Klinikën Infektive në Prishtinë. Në raportin policor thuhet se “me vendimin e prokurorit, trupat e pa jetë të viktimave dërgohen në Institutin e Mjekësisë Ligjore për ekspertizë. Rasti është duke u hetuar”.