Llava e zjarrtë që u derdh të dielën nga shpërthimi i një vullkani në Republikën Demokratike të Kongos, duket se është ndalur pasi arriti në periferi të qytetit Goma, sipas një korrespondent të AFP-së në vendngjarje. Mijëra njerëz u larguan kur mali Nyiragongo shpërtheu gjatë natës duke bërë që masa shkëmbore e shkrirë, të rridhte në një shteg drejt qytetit lindor. Zyrtarët thanë se llava kishte arritur në aeroportin e qytetit Goma, në periferi të metropolit në brigjet e liqenit Kivu, megjithëse banorët thanë se ajo ishte ndalur në buzë të objektit. Mbi 10 lëkundje toke u ndjenë në Goma herët në mëngjes. "Njerëzit kanë filluar të kthehen në shtëpitë e tyre. Situata duket se është qetësuar për momentin," tha një banor. "Por njerëzit janë ende të frikësuar. Autoritetet ende nuk kanë bërë ndonjë njoftim zyrtar deri më tani këtë mëngjes," shtoi ai. Hera e fundit që Nyiragongo shpërtheu ishte më 17 janar 2002, duke vrarë më shumë se njëqind njerëz dhe duke mbuluar pothuajse të gjithë pjesën lindore të Gomas me llavë, duke përfshirë gjysmën e brezit të aeroportit. Gjatë atij shpërthimi, viktimat ishin kryesisht të sëmurë ose të moshuar të braktisur, në zonën veriore të qytetit, ku pati edhe shumë plaçkitje.