Një komision i Dhomës së Përfaqësuesve ne Shtetet e Bashkuara, që mori në analizë abuzimin e mundshëm të tregut nga katër prej kompanive më të mëdha të teknologjisë, konstatoi se ato përdorin metoda të padrejta, si për shembull i godasin firmat e reja që mund t’i konkurojnë “duke i blerë dhe zhdukur”, apo u vendosin bizneseve të vogla tarifa jashtëzakonisht të larta duke i detyruar ato të hyjnë në kontrata "të padrejta" në emër të fitimit. Paneli, një nënkomision kundër monopoleve i Komisionit të Ligjeve sic shpjegon VOA, rekomandoi që kompanitë Alphabet Inc, Apple, Amazon dhe Facebook nuk duhet të kontrollojnë dhe njëkohësisht të ushtrojnë aktivitet në të njejtin biznes, por nuk rekomandoi megjithate ndarjen e tyre në kompani më të vogla. Raporti shumë kritik prej 449 faqesh, përshkruan dhjetëra raste kur kompanitë keqpërdorën pushtetin e tyre, duke zbuluar kështu një kulturë korporatash, që duket se zgjedhin të bëjnë çfarë të munden që të ruajnë dominimin mbi pjesë të mëdha të internetit. "Për ta thënë thjesht, kompanitë që dikur ishin të çorganizuara, të vogla dhe që sfiduan status quo-në e atëhershme, janë bërë sot si ato monopole që i kemi parë për herë të fundit në epokën e baronëve të naftës dhe manjatëve të hekurudhave", thuhet në raport.