Disa studiues thanë të mërkurën se do të analizojnë ADN-në e eshtrave të Kristofor Kolombit, për të sqaruar një herë e mirë origjinën e tij. A ishte ai nga Gjenova, qytet-porti i Italisë, sic besojnë shumica e historianëve? Apo ishte spanjoll ose portugez? Teoritë janë të shumta. Pesë shekuj pas vdekjes së tij në vitin 1506, ky studim mund të mbyllë më në fund debatin mbi origjinën e eksploratorit të famshëm, udhëtimet e të cilit për llogari të monarkëve spanjollë nga viti 1492 deri 1504, i hapën rrugën Europës për kolonizimin e kontinentit amerikan. Rezultatet e këtij studimi revolucionar priten në tetor të këtij viti. I nisur në vitin 2003, studimi arriti një pikë kthese pasi testet e ADN-së vërtetuan se eshtrat e gjendura në një varr në katedralen e qytetit të Seviljes, i përkisnin Kolombit. Por ky studim u ndërpre në vitin 2005, pasi ekipi i studiuesve besonte se, asokohe, teknologjia e ADN-së, do të çontë dëm një pjesë te konsiderueshme të eshtrave, dhe do të përftohej shumë pak informacion. Kështu, ekipi vendosi t’i ruante eshtrat deri sa “të kishin një teknologji më e mirë”, që do të përdorte kampione të vogla të kockave. Sic e dimë, në ditët e sotme kjo gjë është bërë realitet. Pra, ADN-ja e eshtrave të Kolombit, të cilat ruhen në një kasafortë në Universitetin e Granadas, do të krahasohet me ADN-në e eshtrave të atyre që besohet të jenë të afërm të eksploratorit të madh. Gjithashtu, objekt i krahasimit të ADN-së do të jenë edhe persona të gjallë, që mbajnë të njëjtin mbiemër, nga vendet e tjera kandidate për origjinën e Kolombit. Megjithë rëndësinë e madhe të këtij studimi, ekspertët janë të vetëdijshëm që në çdo rast, përfundimet e tij nuk do mund të konsiderohen 100 % të sakta dhe të besueshme. Pamjet: AFP