Pas 4 muajve në pranga, Lefter Koka është dorëzuar, duke dhënë dëshminë e tij të parë për prokurorët e prokurorisë speciale SPAK. Ashtu sikurse edhe pritej, ish-ministri nuk e ka zbutur pozitën e tij juridike, duke mos zgjedhur një bashkëpunim me drejtësinë, por thjesht këmbënguli se ka zbatuar vetëm ligjin gjatë kryerjes së detyrës. Dhe për rrjedhojë nuk ka asnjë përgjegjësi, në atë që tashmë njihet si afera e inceneratorëve. Marrja në pyetja ka zgjatur jo pak, por plot rreth 3 orë e 30 minuta. Në thuajse çdo përgjigje, Lefter Koka ka mohuar lidhjen me tenderat e inceneratorëve të Elbasanit, Tiranës apo Fierit. E gjitha narrative e tij ka qenë e thjeshtë, në zbatim të procedurave ligjore. “Nuk e kam shpërdoruar detyrën. Kam zbatuar ligjin. Kam ngritur Komisione në përputhje me ligjin. Kryeni ekspertim, nëse ka punime ose jo. Nuk i njoh fare kompanitë që përmendni”. Një tjetër pikë, për të cilën hetuesit thonë se ekzistojnë prova të forta fajësie është edhe një tokë, për të cilët është shpronësuar në Fier si truall dhe jo tokë orë. Dyshimet për falsifikim të firmave kanë qenë një pikëpyetje e madhe për hetuesit, të cilët morën prej Kokës këtë përgjigje. “S’është firma ime. S’kam dijeni, nuk mund ta di unë nëse ka falsifikim. Edhe vetë prokurorisë, iu desh të kryejë ekspertim. Është trajtuar si tokë arë dhe jo tokë truall, se nëse do ishte trajtuar si truall, çmimi do ishte 6 herë më i lartë. Për më tepër, ajo tokë kur doli leja e ndërtimit u shndërrua nga tokë arë në tokë truall”.