Kur na ndajnë 3 javë nga nisja zyrtare e sezonit të ri parlamentar, duket se shtatori pritet të sjellë ndryshime në konfigurimet politike. Ish-kryeministri Sali Berisha, në konferencën e përjavshme me gazetarët ishte i qartë, teksa paralajmëroi se në shtator, ai dhe deputetët mbështetës të tij do të krijojnë grupin e tyre parlamentar. Sipas Rregullores së Kuvendit të Shqipërisë, ka dy mënyra për formimin e grupeve parlamentare, sipas përkatësisë partiake apo sipas orientimit politik. Nisur nga ky parashikim, ish-kryeministrit Berisha dhe deputetëve mbështetës, do ju duhet të krijojnë një formacion të ri politik, ose do të duhet të krijojnë një grup të ri sipas orientimit të tyre politik. Për më saktë, Rregullorja e Kuvendit, në nenin 15¬¬¬21, pika 3 e tij parashikon: Grupet parlamentare, sipas orientimit politik, mund të formohen menjëherë pas konstituimit të Kuvendit ose gjatë legjislaturës, nga deputetë të pavarur, nga deputetë që largohen nga partia politike për të cilën kanë konkurruar në zgjedhje, nga deputetë që janë deklaruar jashtë grupeve ose kur krijohet një subjekt politik i ri.