Menjëherë pas depozitimit të dosjeve voluminoze për ankimim të rezultateve të zgjedhjeve në 9 qarqe të vendit, kryetari i Partisë Demokratike, Lulzim Basha ka filluar takimet në terren me strukturat e kësaj force politike. Në fjalën e tij Basha ngriti akuza të forta duke pretenduar kërcënime të administratës publike për të siguruar vota si dhe nuk la pa përmendur edhe emra konkretë të përfshirë në këtë çështje. Të gjithë jemi dëshmitarë sesi kërcënuan administratën publike sesi e përdorën atë, sesi punësuan në mënyrë të paligjshme dhe pastaj kanë filluar largimin nga puna, që nga Ardian Çela i OSHEE tek Benet Beci i KESH-it e Laert Duraj i Postës Shqiptare e dhjetëra e dhjetëra të tjerë dosjet e të cilave dergjen prej dy muajsh në SPAK dhe në Prokuroritë e vendit. Sfidë për drejtësinë e re, e ka konsideruar Basha depozitimin e ankimimeve për rezultatet e 9 qarqeve. Në fjalën e tij kryedemokrati ka akuzuar Komisionin e Ankimimeve dhe Sanksineve për zbatim të urdharave të Edi Ramës . Kjo është një sfidë për drejtësinë e re, kjo është një sfidë për institucionet zgjedhore ku dje janë depozituar kërkesat për pavlefshmërinë në 9 qarqe dhe rivotimin në 9 qarqe. Është e njëjta KQZ dhe i njëjti KAS i cili me urdhër të Edi Ramës prishi fletën e votimit, pasi prishën Kushtetutën dhe pasi miratuan në mënyrë anti-Kushtetuese ndryshimet e 5 tetorit. Në këtë takim të demokratëve ka dominuar insistimi i tyre në mosnjohjen e rezultatit të zgjedhjeve, duke mos sqaruar nëse pretendimet e demokratëve do të shoqërohen apo jo me protesta në ditët në vijim.