Një shtetas shqiptar është vënë në prangat e policisë italiane në Ankona, pasi u kap me një sasi të konsiderueshme lënde narkotike të llojit kokainë dhe hashash, të cilat i kishte ndarë në doza, gati për t’i shitur. Shqiptarit, emri i të cilit ende nuk bëhet me dije, iu kapën 104 doza kokainë dhe disa qese hashash, të cilat nëse do të shiteshin në treg do të arrinin vlerën e 17 mijë eurove. Hetimi ndaj trafikantit shqiptar kishte nisur prej disa kohësh, pasi policia italiane kishte marrë informacione për lulëzimin e një aktiviteti të shpërndarjes së lëndëve narkotike. Polici nuk kishte mundur ta lokalizonte më herët, sepse ky I fundit nuk kishte një vendbanim fiks në Itali. Mirëpo, një nga të dhënat që grupi hetimor dispononte ishte se shqiptari lëvizte me makina të marra me qira dhe përmes tyre e shpërndante lëndën narkotike për të mos rënë në sy. Kështu pasditen e së martë ai u identifikua në një citroen C1 në një zonë që ai shpesh frekuentonte. Pas ndalimit dhe një kontrolli të imtësishëm nga policia, në derën e automjetit që drejtonte shqiptari u gjetën të fshehura 104 doza kokainë si dhe 4 mijë euro cash, që sipas policisë ishin siguruar nga shitja e drogës. Agjentët e shtrinë kontrollin edhe në banesën e riut, ku gjetën edhe hashashin e fshehur në raftin e rrobave. Tashmë trafikanti shqiptar është pas hekurave, ndërkohë që hetimet për aktivitetin e tij kriminal dhe përfshirjen e mundshme të personave të tjerë vijojnë nga Prokuroria pranë Gjykatës së Ankonës.