Fëmijë të familjeve në nevojë, komunitetit rom dhe egjiptian i janë bashkuar kampeve verore të hapura nga Bashkia e Tiranës. Kryebashkiaku Erion Veliaj është bërë pjesë e aktiviteteve dhe lojrave të grupit të fëmijëve pjesëmarrës në njërin prej kampeve të ngritura në Parkun e Liqenit Artificial. Veliaj:“Një pjesë e qytetit ka shkuar me pushime, por ka shumë prindër që janë ende në punë ose ka familje që nuk i kanë të gjitha mundësitë për t’i filluar pushimet që në korrik, prandaj në zemër të Tiranës, te parku më i bukur që kemi, ku temperatura është më e ulët, po organizojmë, si çdo vit, kampin veror për fëmijë. Më kanë bërë shumë përshtypje super talentet që pashë këtu. Jam i sigurt se do të bëheni të gjithë të famshëm, sa në balet, sa në sport, sa me leximet dhe gjërat e mençura që po mësojnë. Por, mbi të gjitha, këtu i mësojmë fëmijët të rrinë me njëri-tjetrin, të krijojnë shoqëri të reja”.