Një 41 vjecar nga Fieri ka tentuar të kalojë nga Shqipëria në Greqi një sasi të konsiderueshme valute, të cilën e kishte futur në një valixhe. Por, për shkak të kontrolleve intensive të Policisë për parandalimin, evidentimin dhe goditjen e paligjshmërisë e sidomos kontrolleve në kuadër të masave anticovid, është zbuluar rasti i mosdeklarimit të të hollave në kufi. Kësisoj janë sekuestruar 50 mijë euro, ndërsa ka nisur procedimi penal për personin që dispononte këtë sasi parash dhe që e kishte fshehur në një valixhe. Ai ka rënë në grackën e Policisë, bazuar në analizën e riskut, teksa ka kaluar për kontroll në vijën e dytë mjetin tip "Toyota". Bëhet fjalë për shtetasin me inicialet I. Sh. Në përfundim të veprimeve të para të kryera nga specialistët e Seksionit të Hetimit të Krimit Ekonomik e Financiar në DVP Gjirokastër, shtetasi I. Sh. u procedua penalisht për veprat penale "Mosdeklarimi i të hollave dhe sendeve me vlerë në kufi" dhe "Pastrimi i produkteve të veprës penale ose veprimtarisë kriminale".