14 nga 16 të sëmurë rëndë me Covid janë shëruar pas mjekimit me një ilac eksperimental të krijuar në Qendrën Mjekësore Ichilov të Tel Avivit. Dy të tjerët mbeten në gjendje kritike, por të stabilizuar e janë nën kontrollin e mjekëve. Allocetra deri tani po bën mrekulli, sipas raporteve në shtypin e huaj. Ajo praktikisht lufton stuhinë e citokinës –reagimi imunitar potencialisht vdekjeprurës ndaj infeksionit që besohet të jetë përgjegjës për pjesën më të madhe të vdekjeve të lidhura me Covid 19. Allocetra përdor vetë mekanizmat rregullues të trupit për ta fashitur këtë stuhi pa e bllokuar nga ana tjetër sistemin imunitar. Trajtimi përfshin futjen e miliarda qelizave apoptotike ne gjak, të cilat ushqejnë reaguesit e parë të trupit duke qetësuar shpërthimin imunitar. Në fillimin e testimit, 9 pacientë ishin në gjendje mjaft të rëndë ndërsa 7 të tjerë luftonin për jetën. 14 prej tyre tashmë janë shëruar e kanë dalë nga spitali. Ilaçi pritet të kalojë në fazat e mëtejshme të provës, e nëse miratohet, ai mund të ndryshojë panoramën e përpjekjeve kundër sëmundjes që ka pushtuar globin.