Italia do t’i ashpërsojë masat kundër koronavirusit, pas rritjes së numrit të rasteve të reja. Në një adresim televiziv, të dielën mbrëma, kryeministri Giuseppe Conte tha se masat janë të nevojshme “për të shmangur izolimin e plotë”. Conte tha se kryebashkiakët do të kenë kompetenca për të mbyllur hapësirat publike pas orës 21:00, ndërsa orari i restoranteve do të kufizohet, ashtu si edhe numri i njerëzve që mund të grumbullohen në publik. Konferencat lokale dhe festivalet do të pezullohen gjithashtu. “Qeveria është këtu, por të gjithë duhet ta bëjnë pjesën e tyre”, tha Conte. “Masat më efektive mbeten masat paraprake themelore: maska, distanca dhe higjiena e duarve”, shtoi ai.