Ish-deputetja demokrate, Jorida Tabaku, ka reaguar në lidhje me raportin e fundit të Global Initiative, ku thuhej se në Shqipëri 50% e popullsisë paguajnë rryshfet dhe 40% e GDP është ekonomi informale. Në një postim në rrjetet sociale, Tabaku shkruan, se Shqipëria është kthyer në një lavatriçe të pastrimit të parave. “Shqipëria e zhytur në korrupsion dhe pastrim parash me burim trafikun e drogës”, shkruan Tabaku ne rrjetet sociale. “Sipas raportit 30% e kontratave të tenderave publik shkojnë për të korruptuar qeveritarët. E përkthyer në parà, rezulton se për vitin 2018-2019 janë tenderuar gjithsej 679 mln euro nga të cilat gati 200 mln euro kanë qenë para që kanë shkuar për korrupsion. Ky raport me të dhëna tronditëse përllogarit se të paktën në 50% të rasteve shqiptarët paguajnë për rryshfet”, thekson ish deputetja.