Irani sipas vlerësimit të Agjencisë Ndërkombëtare të Atomit ndërkohë posedon sasi uraniumi që është thuajse i përshtatshëm për armët. Ky material ka një gradë pastërtie deri në 60 përqind. Në grindjen me Iranin për armët atomike sërish po përforcohen shenjat për konfrontim. Agjencia bërthamore ndërkombëtare shpreh shqetësim për mungesën e informacioneve lidhur me prejardhjen e gjurmëve të uraniumit, që kanë gjetur kontrollorët e saj gjatë inspektimeve të posaçme në Republikën Islamike. Kjo mësohet nga një raport i shefit të agjencisë, Rafael Grossi dërguar 173 vendeve anëtare. Mos përparimi i bisedimeve prej muajsh ia bën të vështirë agjencisë që të konstatojë një orientim paqësor të programit bërthamor të Iranit, shkruan Grossi. Shefi i agjencisë njëkohësisht tërheq vëmendjen për informacionet e mangëta të udhëheqjes iraniane mbi impiantet e dyshimta, që me gjasë përdoren për aktivitet bërthamor. Eshtë „shqetësuese, që diskutimet teknike mes IAEA-së dhe Iranit nuk kanë arritur rezultatet që priteshin". Irani posedon, sipas raportit të IAEA-së mbi 3200 kg uranium të pasuruar në shkallë të ndryshme – gati 16 herë më shumë nga sa lejon marrëveshja. Sipas marrëveshjes Irani lejohet të prodhojë vetëm material me më pak se katër përqind pasurim për të vënë në funksionim reaktorët. Për armët bërthamore pasurimi në fakt duhet të jetë rreth 90 përqind, megjithatë një material i pasuruar deir në 60 përqind teorikisht mund të përdoret për prodhim armësh.