Rritja e vazhdueshme e çmimeve pritet të jetë prezente në Shqipëri deri në vitin 2027, duke bërë që inflacioni të kapërcejë mbi objektivin 3 për qind të Bankës së Shqipërisë. Megjithatë, sipas drejtorit të departamentit të politikës monetare, Erald Themeli, kjo rritje inflacioni nuk parashikohet të jetë në nivelin e impaktit ekonomik që pati lufta në Ukrainë, për këtë arsye u vendos të mbahej e pandryshueshme norma bazë e interesit në 2.5 për qind. “Projeksionet tona për të ardhmen sugjerojnë se trendi i inflacionit do të vijojë të ketë rritje gjatë gjysmës së dytë të 2026 dhe gjatë gjysmës së parë të 2027, rritje që pritet ta sjellë këtë tregues diçka mbi objektivin 3% të BSH, megjithatë një rritje mjaft më e kufizuar në raport me ecurinë e inflacionit që patëm pas luftës në Ukrainë. Presim një rritje të kontrolluar të inflacionit dhe rritje afatshkurtër mbi objektiv.”