Një akt armiqësor e ka quajtur Serbia njohjen e Kosovës nga Kenia. Beogradi zyrtar paralajmëroi se do të marrë të gjitha masat e nevojshme diplomatike, duke theksuar se vendimi për të njohur Kosovën “shkelje të rëndë të së drejtës ndërkombëtare dhe cenim të drejtpërdrejtë të Rezolutës 1244 të Këshillit të Sigurimit të Kombeve të Bashkuara”. Qëndrimi erdhi nga Ministria e Punëve të Jashtme e Serbisë raporton RTS. Sipas ministrisë serbe Kenia ka shkelur edhe Kartën e OKB-së”. Kjo njohje, sipas MPJ-së së Serbisë “minon gjithashtu përpjekjet për dialog konstruktiv, stabilitet rajonal dhe respektimin e rendit juridik ndërkombëtar”. Po ashtu në njoftimin e dhënë, Serbia tha se njohja e Kosovës do të ndikojë në marrdhëniet e saj me Kenian. Serbia pretendon se në 8 vitet e fundit “28 shtete kanë tërhequr ose pezulluar njohjen e pavarësisë” së Kosovës, dhe se “vetëm dy shtete të reja kanë marrë vendim për njohje”. “Shumica e qartë e bashkësisë ndërkombëtare, ligji dhe drejtësia janë në anën e Serbisë. Serbia mbetet e përkushtuar për ta mbrojtur sovranitetin dhe integritetin e saj territorial me të gjitha mjetet diplomatike dhe juridike në dispozicion”, thuhet në reagim.