Ambasada e Italisë në Tiranë, në një njoftim në rrjetet sociale ka theksuar se kanë kryer pagesën e llogarisë së lënë pa paguar nga turistët italianë, në një restorant në Berat. Selia diplomatike thotë se sipas porosisë së kryeministres Giorgia Meloni, ambasadori ka qenë sot në Berat, duke shtuar se uron që raste të tilla të mos përsëriten. Incidenti u bë viral, pas denoncimit të restorantit “Guva”, në rrjetet sociale, për mospagesën e faturës prej 80 euro nga një grup prej 4 turistësh italianë. “Sipas porosisë së Kryeministres Giorgia Meloni, kryem pagesën e llogarisë së lënë pa paguar nga një grup turistësh italianë në një restorant në qytetin e Beratit. Italianët u përmbahen rregullave dhe i shlyejnë detyrimet e tyre dhe urojmë që ndodhi të tilla të mos përsëriten më”, njofton Ambasada Italiane në Tiranë.