Zgjedhjet parlamentare të 25 prillit për shkak të teknologjisë që do të përdoret pritet të jenë më të shtrenjtat në historinë e 30 viteve demokraci. Komisioni Qendror i Zgjedhjeve, përmes një shkrese zyrtare i është drejtuar qeverisë për fondet që duhen për venien në zbatim të projektit për identifikimin elektronik të votuesve. Shuma e kërkuar kap afërsisht vlerën e 2 miliardë lekëve. KQZ sqaron se grupi i punës i ngritur për këtë cështje vlerësoi kostot financiare dhe numrin e personave që do angazhohen për përdorimin e sistemeve dhe pajisjeve të teknologjisë së informacionit. “KQZ iu drejtua me kërkese 22 kompanive me përvojë në fushën e teknologjisë dhe në përfundim mori në konsideratë 6 kompani. Duke marrë parasysh se afatet për realizimin e projektit janë të limituara, 145 ditë nga zgjedhjet, dhe buxheti i vitit 2021 është miratuar pa përfshirë këtë projekt, kërkojmë ndërhyrjen emergjente për vënien në dispozicion të fondeve të domosdoshme ‘Për implementimin e projektit të identifikimit elektronik të zgjedhësve për zgjedhjet e datës 25 prill 2021′, në shumën totale 2.112.304.484 lekë“, thuhet në kërkesë. Por nuk është ky fondi i vetëm i kërkuar nga KQZ, pasi një kosto shtesë që kap vlerën 10 milionë euro do t’i kërkohet qeverisë për pilotimin e votimit dhe numërimin elektronik. Pajisja elektronike që do të përdoret në zgjedhjet e 25 prillit të vitit 2021 synon të shmangë votimin e shumëfishtë dhe votimin familjar.