Edison Begaj, i cili i shpëtoi atentatit me katër plumba para disa javësh, ka rënë në prangat e policisë gjatë mbrëmjes së të hënës. Forcat Renea dhe policia e Vlorës zbarkuan në Lungomare pasi ishin në kërkim të personave të shpallur në kërkim për armëmbajtje pa leje. Gjatë operacionit, u arrestua Edison Begaj, i cili po lëvizte me armë zjarri pa leje. Ndërkohë, u shoqëruan për në komisariat edhe 10 persona të tjerë. Mbrëmjen e 29 majit, Begaj i shpëtoi atentatit me 4 plumba në sy të dy fëmijëve nga një person i veshur si polic. Në pamjet e siguruara nga Top Channel duket Edisoni që ka qenë duke hapur portën e banesës së tij dhe në makinë ndodheshin edhe dy fëmijët. Ai ka dalë nga makina dhe kur është kthyer, një person ende i paidentifikuar i maskuar dhe I veshur si polic ka ardhur nga rruga kryesore duke iu drejtuar makinës. Në një distancë shumë të afërt, ai e qëlloi me armë fillimisht në bark, Begaj filloi të sprapset dhe disa nga plumbat e kapën në pjesën e këmbëve. Ai u shtri përtokë, ndërsa fëmijët u frikësuan nga të shtënat. Më pas, Begaj u dërgua me urgjencë në spital për të marrë trajtim mjekësor. Edison Begaj rezulton se ka qenë subjket i OFL në maj të 2020-ës që kërkonte burimin e pasurisë së tij, pasi Gjykata e Apelit të Krimeve të Rënda Tiranë e kishte dënuar me 7 vite e 6 muaj burgim, për veprat penale “Prodhimi dhe shitja e narkotikëve” dhe “Prodhimi dhe mbajtja pa leje e municioneve luftarake”. Në shkurt të 2008-ës, policia e Vlorës vuri në pranga shtatë persona, mes tyre edhe Begajn, duke i dhënë fund veprimtarisë 10-vjeçare kriminale të një bande e cila trafikonte drejt Italisë drogë dhe armë. Gjatë operaciobnit në atë kohë u sekuestruan 284 kilogramë hashash të ndara në tetë pako të mëdha, në një furgon fshatin Ndërmenas të Fierit, ku u gjetën dhe disa armë zjarri.