Marrëveshja e ekstradimit mes Shqipërisë dhe Spanjës, e cila hyri në fuqi në 16 mars të këtij viti, duket se po jep efektet e dëshirueshme në kapjen e personave në kërkim kombëtar. Drejtori i përgjithshëm i policisë së shtetit, Gledis Nano së bashku me atasheun e Ministrisë së Brendshme spanjolle dhe drejtuesin e njësisë ENFAST Netëork, vlerësuan progresin e deritanishëm të autoriteteve ligjzbatuese të dy vendeve. “Policia e Shtetit ka bërë një punë paraprake për evidentimin dhe verifikimin e të gjithë personave të kërkuar nga autoritetet spanjolle dhe me hyrjen në fuqi të marrëveshjes, në koordinim të ngushtë me autoritetet spanjolle të zbatimit të ligjit, veçanërisht me strukturat e INTERPOL-it dhe FAST-it të të dy vendeve, ka filluar operacioni dhe deri tani janë arrestuar 7 shtetas shqiptarë, për veprat penale: “Trafikimi i lëndëve narkotike”, “Organizata kriminale”, “Falsifikimi i dokumenteve” dhe “Shkelja e ligjit për drogat”.