Marrëveshja e paqes midis DR Kongo-Ruandës u prit me skepticizëm në qytetin e mbajtur nga rebelët. Nënshkrimi i një marrëveshjeje paqeje midis qeverive të Republikës Demokratike të Kongos dhe Ruandës në Uashington ka shkaktuar reagime të përziera, me ish-presidentin kongolez, Joseph Kabila, që e përshkroi atë si "asgjë më shumë se një marrëveshje tregtare". Pakti i nënshkruar të premten kërkonte "çarmatimin dhe integrimin e kushtëzuar" të grupeve të armatosura që luftojnë në lindje të Republikës Demokratike të Kongos, por ofroi pak detaje të tjera. Ndërsa disa, përfshirë Kabilën, kanë qenë kritikë, të tjerë e kanë përshëndetur marrëveshjen si një pikë kthese në një konflikt shkatërrues që ka zgjatur për dekada të tëra. Ruanda ka mohuar akuzat se mbështet një grup të armatosur, të njohur si M23, i cili ka luftuar në lindje të Republikës Demokratike të Kongos. Konflikti u përshkallëzua në fillim të këtij viti kur rebelët e M23 morën kontrollin e pjesëve të mëdha të Republikës Demokratike të Kongos lindore, duke përfshirë kryeqytetin rajonal, Goma, qytetin e Bukavu dhe dy aeroporte. OKB-ja thotë se mijëra njerëz janë vrarë dhe qindra mijëra civilë janë detyruar të largohen nga shtëpitë e tyre pas ofensivës së fundit rebele. M23 i kundërshton shifrat, duke thënë se më pak se 1,000 njerëz kanë vdekur. Pas humbjes së territorit, qeveria e RD të Kongos iu drejtua SHBA-së për ndihmë, duke ofruar qasje në minerale kritike në këmbim të garancive të sigurisë. RD e Kongos Lindore është e pasur me koltan dhe burime të tjera jetësore për industritë globale të elektronikës.