I dërguari special i Departamentit të Shtetit të SHBA-së, James Rubin, ka nisur turin e tij të vizitave në Ballkanin Perëndimor, teksa stacioni i parë ka qenë kryeqyteti i Malit të Zi, Podgorica. Duke folur për mediat malazeze, Rubin është ndalur edhe te raportet mes Serbisë dhe Kosovës, teksa ka vlerësuar maksimalisht përpjekjen e Bashkimit Europian për t’i ulur në tryezën e bashkëpunimit. Krahasuar me 20 vite më parë, shoh dallime të mëdha, pasi kemi kaluar nga masakrat ndaj civilëve, te tryeza e bisedimeve. Për të ecur përpara, duhen marrë vendime të vështira, por shumë të rëndësishme. Disa vendime të vështira janë marrë tashmë nga liderë të të dy vendeve, por duhen ende të tjera, për të vendosur normalitetin e plotë të marrëdhënieve mes Kosovës e Sebisë”, tha ai. James Rubin ka qenë ndihmës i Sekretares së Shtetit, Madeleine Albright në periudhën 1997-2000 dhe njeh mjaft mirë çështjet e Ballkanit e sidomos situatën mes Kosovës dhe Serbisë. Pas vizitës në Podgoricë, Rubin do të fluturojë drejt Beogradit, më pas Shkupit dhe në fund Tiranës, për të mbyllur turin e tij në Ballkanin Perëndimor.