Në vijimësi të operacionit policor të koduar “Investitori” specialistët e Seksionit për Hetimin e Krimit Ekonomik dhe Financiar kanë evidentuar disa raste mashtrimesh të kryera në bashkëpunim më shumë se një herë si dhe mashtrime me pasoja të rëndë. Burimet zyrtare bëjnë me dije se një 39 vjeçar është vënë në pranga pasi Gjykata e Shkallës së Parë Tiranë i ka vendosur masën e sigurimit personal “Arrest në burg” për veprat penale “Mashtrim i kryer në bashkëpunim, më shumë se një herë” dhe “Mashtrim me pasoja të rënda”. Dyshohet se këto vepra penale janë kryer në bashkëpunim me një tjetër shtetas i cili është shpallur në kërkim. Mësohet se skema e mashtimit ka qenë e tillë, dy shtetasit iu kanë marrë shuma të konsiderueshme parash shtetasve të ndryshëm, duke iu premtuar klering/ndërrim apartamentesh, njësi shërbimi, hekur në funksion të ndërtimeve të pallateve apo pajisje me kabina elektrike të tensionit të lartë në funksion të pallateve. Gjithashtu edhe një 49 vjeçare është vënë në pranga pasi hiqej si investitore dhe i merrte shuma të konsiderueshme shtetasve të ndryshëm, vepër penale të cilin e ka konsumuar edhe më parë.