Ish-prokurori, Shkëlqim Hajdari, ishte i ftuar në “Breaking” në Top Neës, për të folur në lidhje me ngjarjen që ndodhi në aeroportin e Rinasit, ku kontrollorët vendosën që të mos jepnin shërbimin e tyre. Hajdari u shpreh se kjo çështje është një njollë për Shqipërinë, ndërsa përmendi edhe ndëshkimin ligjor për ta. Sinkron: “Unë kam thënë që në fillim kthehuni në punë se jeni në kufijtë e konsumimit të veprës penale. Procedimi penal ka nisur, një pjesë e tyre janë arrestuar”. Ai tha se nga qeveria nuk ka asnjë shkelje të ligjit, pasi është domosdoshmëri jetike mbajtja hapur e kontrollit. Ish-prokurori vijoi duke thënë se tani është i gëzuar që Shqipëria nuk është më pjesë e lajmeve të këqija. Sinkron: “Duhet të shërbejë për ta shkundur atë institucion, që përveç punës së madhe, ka qenë i përkëdhelur. Pretendimet e tyre mund të jenë të ligjshme, por mënyra që zgjodhën për të realizuar qëllimet e tyre është në kundërshtim me kontratën e tyre. Ju dukej vetja të pazëvendësueshëm. Por erdhën kontrollorë nga Turqia dhe Greqia që i kemi vende të NATO-s, kështu ka ndodhur edhe në vende të tjera”.