Ministri i Brendshëm Bledi Çuci priti këtë të premtë në një vizitë zyrtare homologen e tij britanike, Priti Patel. Në fokus të kësaj vizite ka qenë firmosja e Marrëveshjes së Ripranimit, propozuar nga qeveria britanike fill pas daljes së saj nga Bashkimi Europian. Gazeta britanike Daily Express e përshkruan si historike marrëveshjen e arritur mes dy vendeve për deportimin e shpejtë të shqiptarëve të dënuar në Britani, përfshirë këtu trafikantët e drogës. "Gangsterët shqiptarë kanë qenë të lidhur shumë me tregtinë e drogës në Britaninë e Madhe dhe thuhet se kanë marrë kontrollin e shumë tregjeve të kokainës, sipas Agjencisë Kombëtare të Krimit. Pothuajse 16 përqind e kriminelëve prapa hekurave janë shqiptarë - shkelësit më të lartë kombëtarë të huaj në burgjet e Britanisë. Sekretarja e Brendshme Znj. Patel tha: “Unë jam e vendosur të rregulloj sistemin tonë të imigracionit, të ndaloj hyrjen e paligjshme dhe të heq ata që nuk kanë të drejtë të jenë në Britaninë e Madhe sa më shpejt të jetë e mundur", shkruan media britanike. Britania në harkun kohor të viteve të fundit, është shndërruar jo pak herë, në vendstrehimin apo pikën e ushtrimit të aktiviteteve kriminale të shtetasve apo grupeve të trafikantëve shqiptare, të cilët i drejtohen Anglisë si emigrantë të jashtëligjshëm. Nisur nga kjo situatë, Bledi Çcuçi i ka kërkuar ministres së brendshme britanike, thellim të hetimeve të përbashkëta përmes shkëmbimit intensiv të informacionit, për grupe krimianle që operojnë në dy vendet apo element që i fshihen drejtësisë.