Dëshmia e 53-vjeçarit që plagosi ish-bashkëshorten me thikë në Elbasan mbrëmjen e së dielës zbulon arsyet që mund të qëndrojnë pas këtij akti. Hetimet kanë zbuluar se autori dhe viktima ishin të divorcuar prej katër vitesh dhe janë prindër të dy fëmijëve në moshë madhore. 48-vjeçarja, që ndodhet e shtruar në Spitalin e Elbasanit jashtë rrezikut për jetën jetonte prej kohësh në Itali. Ajo ishte kthyer vetëm pak ditë më parë. Gjatë marrjes në pyetje, 53-vjeçari akuzoi ish-bashkëshorten se i kishte marrë të gjitha pronat. Megjithatë, familjarët e tij pohojnë se 53-vjeçari kërkonte prej kohësh rikthimin me ish-gruan e tij. Ngjarja ndodhi në lagjen Qemal Stafa të Elbasanit, ku 53-vjeçari ka pritur te dera e banesës ish-bashkëshorten e tij dhe pas një debati me tone të larta e ka goditur atë tre herë me thikë, fatmirësisht pa i shkaktuar plagë që t’i kërcënojnë jetën.