Masat shtrënguese anti covid, thuajse po hiqen në disa shtete, kjo për shkak të vaksinimit masiv të popullatës, por edhe sepse koronavirusi tanimë po konsiderohet si një grip normal dhe jo si një sëmundje e rrezikshme. Greqia ka lehtësuar një masë të covid 19, duke mos kërkuar më plotësimin e formuklarit PLF në kufi. Duke filluar nga e marta, qytetarët shqiptarë, por jo vetëm që do të udhëtojnë drejt Greqisë nuk do të duhet më të plotësojnë formularin e PLF. Kjo vlen edhe për udhëtarët që vijnë nga vendet e BE-së ose të zonës Shengen, si dhe nga 35 vendet jashtë BE-së. Në fakt një lëvizje e tillë ishte paralajmëruar edhe më parë nga Ministri i Turizmit i Greqisë, Vasilis Kikiljas. Ky I fundit dhjetë ditë më parë propozoi heqjen e formularit PLF, që sipas tij lehtëson procesin e hyrjes në kufi. Plotësimin e detyrueshëm të formularit PLF, Greqia e vendosi më 1 korrik të vitit 2020 kur pas valës së parë të covid-19 dhe karantinës së parë gradualisht filloi t’i hapë kufijtë për shtetasit e huaj.